പോരുവഴി
ഗ്രാമ പഞ്ചായത്ത്

കേരളത്തിലെ തദ്ദേശ സ്വയംഭരണ സ്ഥാപനങ്ങളിൽ ശുചിത്വ-മാലിന്യ സംസ്കരണ മേഖലയിൽ പ്രവർത്തിക്കുന്ന ഒരു ജനകീയ സംരംഭമാണ് ഹരിത കർമ്മ സേന. കേരള സർക്കാർ നടപ്പിലാക്കിയ 'ഹരിത കേരളം മിഷൻ' പദ്ധതിയുടെ ഭാഗമായി 2017-ലാണ് തദ്ദേശ സ്വയംഭരണ സ്ഥാപനങ്ങളിൽ ഹരിത കർമ്മ സേനകൾ രൂപീകരിച്ചത്.

സർക്കാർ ഉത്തരവ് പ്രകാരം തദ്ദേശ സ്വയംഭരണ സ്ഥാപനങ്ങൾ നിശ്ചയിക്കുന്ന സേവന ഫീസ് (User Fee) ഈടാക്കിക്കൊണ്ട് വീടുകളിൽ നിന്നും സ്ഥാപനങ്ങളിൽ നിന്നും അജൈവ മാലിന്യങ്ങളും, ചിലയിടങ്ങളിൽ ജൈവ മാലിന്യങ്ങളും ഹരിത കർമ്മ സേനാംഗങ്ങൾ നേരിട്ട് ശേഖരിക്കുന്നു.

കൃത്യമായ ഇടവേളകളിൽ ശേഖരിക്കുന്ന അജൈവ മാലിന്യങ്ങൾ മെറ്റീരിയൽ കളക്ഷൻ ഫെസിലിറ്റി (മാലിന്യ ശേഖരണ കേന്ദ്രം) യിലേക്ക് എത്തിക്കുന്നു. അവിടെ മാലിന്യം തരംതിരിച്ച് റിസോഴ്സ് റിക്കവറി ഫെസിലിറ്റി (വിഭവ വീണ്ടെടുക്കൽ കേന്ദ്രം) യിലേക്ക് അയയ്ക്കുന്നു. തുടർന്ന് പുനരുപയോഗത്തിനും പുനഃചംക്രമണത്തിനുമായി അവ കൈമാറുന്നു.

വീടുകളിലെ ജൈവ മാലിന്യ സംസ്കരണത്തിനുള്ള മാർഗ്ഗങ്ങളും പരിഹാരങ്ങളും ഹരിത കർമ്മ സേനയുടെ നേതൃത്വത്തിൽ ലഭ്യമാക്കുന്നു.

ഹരിത കേരളം മിഷൻ, കുടുംബശ്രീ, ശുചിത്വ മിഷൻ, ക്ലീൻ കേരള കമ്പനി, തദ്ദേശ സ്വയംഭരണ സ്ഥാപനങ്ങൾ എന്നിവയെല്ലാം ഹരിത കർമ്മ സേനയുടെ പ്രവർത്തനങ്ങളിൽ പ്രധാന പങ്കാളികളാണ്.